Ek Budhay Shaykh aur Tawaif Ka Waqiah(Tauba ki ek dilchasp kahani)

Ek Budhay Shaykh aur Tawaif Ka Waqiah
(Tauba ki ek dilchasp kahani)

Shaykh Ali At-Tantanwi (Rahimahullah) likhte hain, “Mere paas bohat si kahaniyan hain un ulama ke baare mein jinhon ne sirf apne ikhlaas se logon par gehri chap chodi. Main aik aisi hi kahani sunata hun jo mujhe Professor Ahmad Hasan Az-Zayyat (Risalah magazine ke chief editor) ne sunai.

Ye kahani aik shaykh ke baare mein thi jinka naam unhon ne bataya tha, lekin mujhe yaad nahi raha.

Unhon ne kaha, ‘Ye budhay shaykh aik ustad thay. Unki puri zindagi Al-Azhar masjid ke ird-gird ghoomti thi, jahan wo padhaya karte thay. Ye jagah unke liye sab kuch thi, aur unhein iske ilawa kisi aur cheez ke baare mein kuch pata nahi tha.

Ye us waqt ki baat hai jab ye jagah (Al-Azhar) university mein tabdeel nahi hui thi aur iski rooh ko nichora nahi gaya tha. Wo yahan se thodi door aik ghar mein rehte thay.

Jaise jaise waqt guzra aur unki umar badhi aur sehat kharab hone lagi, unhein ehsaas hua ke ab araam karne ka waqt aa gaya hai. Doctor ne unhein har tarah ke kaam ke mahol se door rehne ka mashwara diya aur kaha ke wo kaam ki jagah ke qareeb bhi na jayen; (ek din) unhein araam karna tha aur parks aur samandar ke kinare jana tha.

To apni zindagi ka naya baab shuru karne ke liye, wo bahar nikle aur aik tanga roka. Un dinon gadiyan nahi hoti thi. Unhon ne driver se kaha, ‘Beta, mujhe kisi achi jagah le chalo, jahan main sukoon se araam kar sakun.’ Lekin driver aik shareer aur bewakoof insaan nikla jo budhay shaykh ko Azbakeyah ke kinaray le gaya, jahan bohat se tawaif khanay (brothels) thay.

Driver ne unhein wahan utar diya aur kaha ke unhein yahan (sukoon ki) jagah mil jayegi. Shaykh ne masoomiyat se poocha, ‘Beta, Maghrib ka waqt hone wala hai. Main kahan namaz parhun? Pehle mujhe masjid le chalo.’ ‘Ye hi masjid hai,’ driver ne kaha (aur ek Tawaif khanay ke bahar shaykh ko utar diya).

Darwaza khula hua tha, aur aik aurat darwazay par khadi thi jaisa ke uske peshe ki auraton ka dastur tha (wo aik Tawaif khanay ke bahar khari thi). Jab shaykh ne usey dekha, to unhon ne apni nigahein neechi kar leen. Unhon ne qareeb aik kursi dekhi aur wahan baith kar Azan ka intezar karne lage.

Wo Tawaif unhen ajeebi tarah se dekhti rahi, ye samajh nahi pa rahi thi ke unke jaise shakhs ko yahan kyu laya gaya, kyunke wo un logon mein se tho nahi thay jo yahan aate thay. Wo unse poochne ki himmat bhi nahi kar pa rahi thi kyunke jo thodi bohat sharam uske andar baqi thi – wo sharam jo aise peshe ki auraton ko bhi mehsoos hoti hai jab wo sacche parhezgar logon ke qareeb hoti hain – usne usey rok diya. Wo Tasbeeh karte huwe apni ghadi dekhte rahe jab tak unhon ne kisi aur ilaaqay se Azan ki awaz nahi suni.

To unhon ne us se poocha, ‘Muazzin kahan hai? Ab to Maghrib ka waqt ho gaya hai. Wo Azan kyun nahi de raha? Kya tum uski beti ho?’ Usne kuch nahi kaha. Wo thoda aur intezar kiye aur phir kaha, ‘Beti, Maghrib ka waqt jald guzar jata hai. Hamein isse der nahi karni chahiye. Mujhe yahan koi nazar nahi aa raha, to agar tumhara wuzu hai, to mere peechay namaz parh lo take jamaaat ho jaye.’

Wo uthay aur Azan di, aur jaise hi wo Iqamat dene walay thay, unhein ehsaas hua ke wo zara bhi nahi hili thi.
‘Kya baat hai? Tumhara wuzu nahi hai?’ Shaykh ne poocha.

Achanak, usi lamhe, Imaan uske andar phir se ubhar aya, aur wo dobara roshan ho gaya. Aik pal mein, wo apni maujuda halat ko bhool gai aur apne maazi mein chali gai: wo maazi jahan wo aik pak aur ba-hayaa larki thi… is gunah se bohat, bohat door.

Wo rone lagi aur seeskiyan bharti hui unke pairon par gir pari. Wo hairaan ho gaye aur samajh nahi pa rahe thay ke usey kaise tasalli dein kyunke wo na to uski taraf dekhna chahte thay na usey chhoona chahte thay. Usne phir unhen apni kahani sunai ke wo kaise is jagah tak aa pahunchi.

Shaykh uski awaz mein gehri nadamat se uski tauba ki sachhai mehsoos kar sakte thay.

To unhon ne kaha, ‘Beti, suno Allah kya farmata hai -Keh dijiye, (Ai Nabi, ke Allah farmata hai,) “Ai mere wo bando jinhon ne apni jaanon par zyadti ki hai! Allah ki rehmat se mayoos na ho, beshak Allah tamam gunahon ko maaf kar deta hai. Beshak wo Bahut Maaf Karne Wala, Nihayat Rahem Wala hai.” –

Tamam gunah, beti, tamam gunah! Beshak, tauba ka darwaza bohat waseeh hai, aur wo har us shakhs ke liye aur zyada kushada ho jata hai jo is mein se guzarta hai, chahe unke gunahon ka bojh kitna hi bhari kyun na ho. Yahan tak ke kufr bhi… agar koi imaan lane ke baad kufr karta hai aur phir apni aakhri saans se pehle tauba kar leta hai aur apni tauba mein saccha hota hai aur apne imaan ko taza karta hai, to Allah usey qabool kar leta hai!

Meri beti, Allah nihayat Kareem hai. Kya tumne kabhi kisi sakhi (generous) shakhs ko kisi aise shakhs ke munh par darwaza band karte dekha hai jo unki panah mein aya ho aur sirf unhi par bharosa karta ho? To utho aur jao, khud ko dho lo aur munasib tareeqay se khud ko dhank lo.

Apni jild ko pani se dho lo aur apne dil ko tauba aur nadamat se, aur phir Allah ki taraf ruju karo.

Main yahan tumhara intezar karunga, to zyada der mat karna warna hum Maghrib bilkul hi kho denge.’

Usne jaisa unho ne kaha waisa kiya aur naye kapdon aur naye dil ke sath bahar aai.

Wo unke peechay khadi hui aur namaz padhi. Wo namaz ki mithaas ko mehsoos kar saki jab isne uske dil ko sukoon diya. Namaz ke baad, shaykh ne us se kaha, ‘Ab, mere sath aao aur is jagah aur iske logon se har tarah ka talluq khatm kar do.

Is jagah ki tamam yaadein mitane ki koshish karo. Apni tauba ko badhao, nek kaam zyada karo, aur ye baat achi tarah jaan lo ke zina kufr se bara nahi hai. Hind, jo aik kafir aurat thi aur Allah ke Rasool (Salallahu Alaihi Wa Sallam) ki dushman thi, jisne unke chacha Hamzah ka kalejah khane ki koshish ki thi, jab wo apni tauba mein sacchi hui, to wo un neik momin khawateen mein se ho gai jinke liye ab hum kehte hain: Radiyallahu Anha (Allah un se raazi ho).’

Budhay Shaykh phir usey aik aise ghar mein le gaye jahan neik auraten rehti theen, takay uski dekhbhal ho sake. Unhon ne aakhirkar uski shadi ka intezam kiya aur shohar ko naseehat ki ke wo uska acha khayal rakhe.”

— Ali al-Tantawi

[Zikrayat, jild 1, safha 252-54].
ذكرايات – للشيخ علي الطنطاوي رحمة الله عليه
(Source: Shah Idris [@Shahidris9 on Twitter])

(Translated into Roman Urdu by Mohammed Manna. For more such content join our paid WhatsApp group at +91-8618575326.)