Khutaba aksar is riwayat ko ye zahir karne ke liye istemal karte hain ke maa ki nafarmani karna kitna khatarnak hai.
“Ek hadees hai ek Sahabi ke baare mein jinka naam ‘Alqamah’ tha; woh maut ke qareeb thay aur kalimah nahi keh pa rahay thay. Phir Nabi (sallallahu alaihi wasallam) ne unki maa ko bulaya, unki maa ne kaha ke woh unke betay Alqamah se naraz hain, kyun ke woh apni biwi ko unpar tarjeeh detay thay. Phir Nabi (sallallahu alaihi wasallam) ne lakdiyon ka gaththa ikattha kiya aur unki maa se kaha ke woh unke bete ko unki aankhon ke saamne jala denge. Maa ne kaha: Aey Allah ke Rasool, ye mera beta hai aur main aapko use apni aankhon ke saamne jalate hue nahi dekh sakti! Nabi (sallallahu alaihi wasallam) ne farmaya: ‘Aey Alqamah ki maa, Allah ka azab zyada sakht aur khatarnaak hai. Agar tum chahti ho ke Allah usay maaf kare, to tum khud usay maaf kardo. Us zaat ki qasam jiske haath mein meri jaan hai, uska namaz, roza, aur zakat uske kuch kaam na aaye ga jab tak tum usse naraz ho.’ Phir us maa ne apne betay ko maaf kar diya, aur kuch der baad woh kalimah pad saka aur dunia se chala basa. Hadees ke mutabiq, is ke baad Nabi (sallallahu alaihi wasallam) ne Muhajireen aur Ansar ko bulakar farmaya: ‘Agar tum mein se koi apni biwi ko apni maa par tarjeeh deta hai, to Allah, farishte, aur saare makhlooq uspar laanat karte hain, aur Allah uska sadaqa aur nek amal qabool nahi karta jab tak ke woh tauba na kare aur apni maa ki maafi aur raza talash na kare. Allah uske maa ki narazgi ki wajah se naraz rehta hai.’”
Abdullah bin Muhammad Zuqail ne is qissay ki tehqeeq apne article mein ki jiska naam hai, ‘Qissatu Alqamah Ma’a Ummihi (Uqooq ul Walidain) La Tahtbut’, aur kaha ki ye qissa jhuta hai aur manghadat (mawdoo, fabricated) hai. Us article se do paragraph ham yahan naqal karenge. InshaAllah.
1. Ibn Al-Jawzi ne “Al-Mawdoo’at” (3/87) mein kaha: “Yeh riwayat Rasool Allah (sallallahu alaihi wasallam) se sahih nahi hai, aur iske raavi Fa’id hai, Ahmad bin Hanbal ne kaha: “Fa’id key Hadith chhod diye gaye hai”, Yahya ne kaha: “Woh kuch nahi hai”, Ibn Hibban ne kaha: “Usse hujjat nahi li ja sakti”, ‘Uqaili ne kaha: “Aur uski mutabi’at nahi hai, siwaaye uske jaise logon ke”, aur iski sanad mein Dawood bin Ibrahim hai, Abu Hatim al-Razi ne kaha: “Woh jhootha tha”.
2. Khulasa (Summary): Yeh kahani sahih nahi hai, aur iske liye koi sahi sanad nahi hai, toh isko bayan karna jaiz nahi hai, aur na hi kisi majlis, khutba, ya khitab mein iska zikr karna chahiye, ya phir kisi risale mein iska tazkirah karna chahiye, aur jo koi aisa karta hai woh bahut si wahiyaat (false) kahaniyon aur ahadith ko phailane ke liye kaam karta hai, jabke sahih Sunnat aur Quran iske liye kafi hai (yani maa baap ke sath nek sulook sikhane ke liye Sahih Ahadis kafi saare hain).
(Compiled and translated by Mohammed Manna.)
Saheehus-Seerah 