Masjid Jaanay Ki Fazilat Ahadith Ki Roshni Mein-by Shaikh Waheed Abdus Salam Baali

Masjid Jaanay Ki Fazilat

1- Jo Shakhs Masjid Mein Apne Farz Namazon Ki Hifazat Karega, Use Jannat Mein Mehmaan Nawazi Naseeb Hogi:

Sahihain (Sahih Al-Bukhari aur Sahih Muslim) mein Abu Hurairah (Radi Allahu Anhu) se riwayat hai ke Nabi (Sallallahu Alaihi Wa Sallam) ne farmaya: 

“Jo shakhs subah ko Masjid ki taraf jaaye aur shaam ko wapas aaye, Allah uske liye har baar jab subah jaaye aur shaam ko wapas aaye, Jannat mein ek rehne ki jagah tayyar karta hai (jis tarah mehmaan ke liye tayyari ki jaati hai).” [Sahih Al-Bukhari 662, Sahih Muslim 669] 

2- Masjid Ki Taraf Chal Kar Jana Gunahon Ka Kaffara Aur Darjaat Mein Bulandi Ka Sabab Hai: 

Imam Muslim ne Abu Hurairah (Radi Allahu Anhu) se riwayat kiya hai ke Rasoolullah (Sallallahu Alaihi Wasallam) ne farmaya: 

“Jo shakhs apne ghar mein wuzu kare, phir Allah ke gharon mein se kisi ghar ki taraf chale, taa’ke Allah ki farz ki hui kisi ibaadat ko ada kare, to uske do qadam is tarah likhe jaate hain: ek qadam ek gunaah mitaata hai aur doosra qadam ek darja buland karta hai.” [Sahih Muslim 666] 

3- Masjid Janay Aur Wapas Aane Ka Sawab Neki Ke Meezan Mein Likha Jata Hai:

Imam Muslim ne Ubayy bin Ka’b (Radi Allahu Anhu) se riwayat kiya hai:  Ek shakhs tha jo sabse zyada doori par rehta tha, lekin kabhi namaz nahi tark karta tha. Logon ne us se kaha, ya main ne us se kaha: “Agar tum ek gadha le lete taake andheray aur shadeed garmi mein sawari kar sako?”  Usne jawab diya: “Main yeh pasand nahi karta ke mera ghar masjid ke paas ho, kyunki main chahta hoon ke masjid tak chal kar jaana aur phir wapas aana, yeh sab kuch (neki ke taur par) mere liye likha jaaye.”

Rasoolullah (Sallallahu Alaihi Wasallam) ne farmaya: “Allah ne tumhare liye yeh sab kuch jama kar diya hai (yani tumhein poora ajar milega).” [Sahih Muslim 663] 

4- Fajr Aur Isha Ki Namaz Ke Liye Masjid Chal Kar Jana Qiyamat Ke Din Noor Banega:

Imam Abu Dawud ne is hadis ki riwayat ki, aur Shaikh Al-Albani ne ise Sahih qarar diya, Buraydah (Radiyallahu Anhu) se riwayat hai ke Nabi (Sallallahu Alaihi Wasallam) ne farmaya: 

“Andheray mein masjidon ki taraf chal kar jaaney walon ko basharat do ke unke liye Qiyamat ke din mukammal roshni hogi.” [Sunan Abi Dawud 561]

(Shaikh Waheed Abdus Salam Baali ka maqala yahan khatam huwa. Neeche ek aur hadith Jumuah ke din masjid chal kar jaanay ki fazilat par is maqalay ke tarjuman ki taraf se mazeed malumat ke liye.)

5- Jumuah Ki Namaz Ke Liye Masjid Chal Kar Jaanay Ka Ajar: 

Aws ibn Aws Ath-Thaqafi (Radi Allahu Anhu) se riwayat hai ke Rasoolullah (Sallallahu Alaihi Wasallam) ne farmaya:  “Jo shakhs Jumuah ke din ghusl kare, khud ko paak saaf kare, jaldi aaye, imam ke qareeb baithe, dhyan se (khutbah) sune aur (khutbay ke douran) khamosh rahe, to uske har qadam par ek saal ke roza aur ek saal ke qiyam ka ajar milega.” [Sunan Al-Tirmidhi 496, Sahih Al-Tirmidhi 410]

Al-Qari ne Mirqat Al-Mafatih (3/1035) mein kaha: “Ek bade alim ne kaha: Humne Islam ki taleemaat mein kisi aur sahih hadith mein is qadar azeem ajar ke baare mein nahi suna, yani: is amal ki pabandi karni chahiye taa’ke is ajar ko paaya ja sake.”

Allah Ta’ala humse yeh qabool kare, aur humein is par amal karne ki taufeeq de. Aur pyare Nabi (Sallallahu Alaihi Wasallam) par salamti, rehmat aur barkat nazil ho. 

(Translator: Mohammed bin Thajammul Hussain Manna.)