Ibn al-Qayyim (Rahmatullahi Alaih), ne farmaya: “Dil ke liye sabse zyada faidemand cheez Qur’an ko tadabbur aur tafakkur ke saath padhna hai.” [Miftah Daar As-Sa’adah (1/553)]
Unhon ne yeh bhi farmaya: “Agar tum Qur’an se faida uthana chahte ho, to usay tilawat karte waqt aur sunte waqt apne dil ko (Quran ki taraf) mutawajjah karo, apne kaan lagakar suno, aur aise haazir raho jaise ke goya woh Zaat jo isay bayan kar rahi hai, Jalla wa ‘Ala, tumse apne Rasool ke zariye mukhatib hai; kyunki yeh ek paigham hai jo usne tum tak apne Rasool ke zariye pahunchaya hai.” [Al-Fawa’id, safha 3]
Tadabbur ke Shara’it (Conditions of Tadabbur):
1. Qubooliyat ka zawiya rakhne wala zarf (ek zinda dil jo haq ko qubool karta ho).
2. Mukallaf shakhs ka amal (tilawat-e-Quran ya sama’at, dil ki poori haaziri ke saath).
3. Jo kuch padha ya suna jaye, uski kuch had tak samajh hona.
Yeh shara’it Allah Ta’ala ki Kitaab ke ek aayat mein moujood hain, jismein farmaya:
{Is mein har sahib-e-dil ke liye ibrat hai aur uske liye jo dil se mutawajja hokar kaan lagaye aur wo hazir ho.} (Surah Qaaf 50:37)
Yeh aayat pehle do shara’it ka zikr karti hai, jabke teesri shart laziman mafhoom mein shamil hai. Kyunki kaan lagane ka amal tabhi mukammal hoga jab sunne wale ko samajh bhi aaye jo kaha ja raha hai. Warna aisi guftagu jo mukammal tor par samajh mein na aaye, jaise kisi Ajami ko (jo Arabi nahi jaanta ho agar wo Quran suney), faida nahi deti.
(Source: Translated from an Arabic post into Roman Urdu from the Telegram channel https://t.me/booksandbenefits)
Saheehus-Seerah 