Shaykh Uthman Al-Khamees (Hafidhahullah) Ka Saltanat-e-Usmania Par Miyanarawahi Wala Mouqaf [Roman Urdu]

Shaykh Uthman Al-Khamees se Sawaal karne wala kehta hai: Kya Daulat-e-Usmania haq par thi?

Jawab: Daulat-e-Usmania deegar (Muslim) riyasaton ki tarah thi, jaise Daulat-e-Umawiyyah, Daulat-e-Abbasiyyah, aur Daulat-e-Ayyubiyyah. Usmein khair bhi tha aur shar bhi; usmein ghalati bhi thi aur durusti bhi. Lekin, ismein koi shuba nahi ke woh ek Islami riyasat aur ek Islami khilafat thi.

Aur Allah ne uske zariye Deen ko nusrat ata ki, aur uske zariye Musalmanon ko izzat bakhshi.

Aur ghalatiyan bhi maujood theen. Baaz hukmaranon mein tasawwuf tha, jaisa ke Daulat-e-Abbasiyyah mein I’tizal¹ tha—yaani Qur’an ke makhlooq hone ka aqeedah—jaisa ke [khulafa] al-Ma’mun, al-Wathiq, aur al-Mu’tasim ke daur mein tha.

Aur baaz governor aise thay jin mein fisq² ka unsar paaya jaata tha, khwaah Daulat-e-Umawiyyah mein ho ya Daulat-e-Abbasiyyah mein, ya riyasat-e-Andalus mein, ya Mamlukon mein. Yeh riyasatein aise baaz hukmaranon ke wujood se khaali na theen jin se zulm sarzad hua, ya jin se fisq sarzad hua, ya jin se ma’asi (gunah) aur is qism ke deegar af’aal sarzad hue.

Lekin, umumi taur par, Daulat-e-Usmania ke zariye Allah ne Islam ko izzat bakhshi, aur unke zariye Allah ne Yahudiyon, Nasraniyon, aur Majusiyon ki sar-kobi ki. Aur unke zariye Allah ne Islam ko sarbulandi ata farmayi, aur Islam ko apna urooj aur quwwat haasil hui.

Aur ismein koi shuba nahi ke woh ek ba-barkat riyasat thi, lekin us se ghalatiyan bhi sarzad huin—is amar mein koi shuba nahi.

Wallahu a’lam.

¹I’tizal (اعتزال): Mu’tazilism, ek aqliyeti Islami ilahiyati firqa jo 8th sadi mein Basra mein ubhra. Inka ek markazi aqeedah “Khalq al-Qur’an” yaani Qur’an ka makhlooq hona tha.
²Fisq (فسق): Ek Islami istelah jo shariat-e-Islami ki khilaf warzi, bad-ikhlaki, ya khullam khulla gunah ke liye istemal hoti hai.

(Shaykh Uthman Al-Khamees Hafidhahullah).