Jab bhi sawal ata hai ki ‘kya Taraveeh aur Witr ke baad bhi Tahajjud ya Qiyam-ul-Layl padh sakte hain?’, tho kayi hazraat jawab mein keh dete hain ki
‘Padne ki zarurat hi nahi hai kyunki Nabi Salallahu Alaihi Wa Sallam ki Hadis hai ki Jisne Imam ke sath puri namaz ada ki, wo saari raat namaz ada karne ke barabar hai. (Sunan An-Nasai, Saheeh (Al-Albanil).
Lekin ye jawab ghalat hai kayi noiyat (angles) se.
#1) Sabse pehli baat ye, ke kya 11 Rakat, jismein witr bhi shamil hai, uske baad koi bhi namaz padna jayaz hai?
Jee haan, jayaz hai. Jin ahadith mein hai ki witr ko aakhri namaz banawo, uska matlab ye nahi ke witr ke baad namaz padna bilkul HARAM hai. Uska matlab hai ki witr ko aam tour par akhri namaz banani chahiye. Lekin agar koi witr ke baad raat ki koi Nafil ya sunnat padh le tho ismein koi harj naji hai. Jaise ke Nabi e Kareem Salallahu Alaihi Wa Sallam se witr ke baad Tahajjud padhna sabit hai (aur Sahabah se bhi).
Witr ke baad Nabi Salallahu Alaihi Wa Sallam ka 2 Rakat Padhna:
Abu Salamah bayan karte hain, “Main ne Hazrat Aisha se Nabi (Salallahu Alaihi Wa Sallam) ki namaz ke baare mein poocha.” Unhon ne farmaya: “Aap (raat mein) terah (13) rakat parha karte thay. Aap aath (8) rakat parhte, phir Witr parhte. Iske baad aap ﷺ baith kar do (2) rakat parhte thay. Phir jab ruku karne ka irada hota, toh kharay ho kar ruku farmate. Aur iske sath sath, aap Fajr ki Azan aur Iqamat ke darmiyan do (2) rakat parhte thay.” (Sahih Muslim)
#2) Kya ye kehna sahih hai ki Imam ke sath puri Taraveeh mukammal kar li tho sari raat namaz ka sawab mil gaya, abhi aur padhne ki zarurat nahi hai?
Ye Nabi Salallahu Alaihi Wa Sallam ki hadis ki ghalat samajh hai. Us hadis ka matlab ye nahi ke aur namaz mat padho, na Allah ke nabi ne aisa samjha na sahaba ne. Wo hadis fazail bayan kar rahi hai imam ke sath taraveeh mukammal karne ki. Agar ‘saari raat namaz ada karne ke barabar hone se’ aur zyada namaz padhne ki zarurat nahi hoti, tho sirf Isha aur Fajr ki Farz padna hi kaafi ho jata. Kyunki jo Isha aur Fajr jamaat se padhe use waise bhi saari raat qiyaam (namaz mein khade hone) ka sawab mil jata hai. (Lekin aisa tho bilkul nahi hai.)
Uthman bin Affan riwayat karte hain ke: Allah ke Rasool (Salallahu Alaihi Wa Sallam) ne farmaya:
“Jo shakhs Isha ki namaz jamaat ke sath aada karta hai, toh usey aadhi raat qiyaam karne ka sawab milta hai. Aur jo shakhs Isha aur Fajr dono namazein jamaat ke sath parhta hai, toh usey poori raat qiyaam mein guzarne ka sawab milta hai.”
[Jami At-Tirmidhi, 221, Sahih (Zubair Ali Zai)]
#3) Kya Sahaba ek Taraveeh ki jamaat ke baad aur ek Jamaat mein padhte thay?
Sunan Abi Dawood 1439 ki riwayat mein Sahabi Talq bin Ali (Radi Allahu Anhu) apne ghar aate hain aur ghar walon ko namaz padhate hain witr ke sath. Uske baad Masjid jakar dubara Imamat karwate hain, lekin dubara Witr nahi padhte. Isse pata chalta hai ki witr ke baad bhi namaz (Taraveeh/Tahajjud) padh sakte hain, lekin witr repeat nahi honi chahiye, aur do (2) jamat mein participate bhi kar sakte hain.
Qays ibn Talq bayan karte hain ke: Hazrat Talq ibn Ali Ramadan ke kisi din hamare paas tashreef laye. Wo shaam tak hamare sath rahay aur hamare sath roza iftar kiya. Phir unhon ne kharay ho kar humein Witr ki namaz parhai. Iske baad wo apni masjid mein gaye aur wahan (logon ko) namaz parhai. Phir jab Witr baqi reh gaye, toh unhon ne ek aur shakhs ko aage kiya aur farmaya: “Apne sathiyon ko Witr ki namaz parhao, kyunki main ne Allah ke Rasool ﷺ ko farmate hue suna hai: ‘Ek raat mein do (2) Witr nahi hote.'” (Abi Dawood, 1439, Sahih (Al-Albanil), Hasan (Al-Arnaut))
Shaikh Saleh Al-Fawzan (Mufti e Azam Saudi Arab, Hafidhahullah) farmate hain:
“Agar koi shakhs Imam ke sath Taraweeh aur Witr parh le, aur phir raat mein Tahajjud ke liye khara ho, toh is mein koi manai (rukawat) nahi hai. Aur wo Witr ko dobara nahi parhega, balkay jo Witr usne Imam ke sath parh liye hain, wahi uske liye kafi hain.
Wo raat mein Tahajjud utni parh le jitni Allah uske liye asaan kare, aur agar wo Witr ko raat ke aakhri hissay tak muakhar (delay) karta hai, toh is mein bhi koi harj nahi hai.
Lekin, is tarah wo Imam ki iqtida (sath parhne k sawab) se mehroom reh jayega, aur behtar yahi hai ke Imam ki pairwi karte hue uske sath hi Witr parhe, kyunki Nabi ﷺ ka farman hai:’ Beshak jo shakhs Imam ke farigh hone tak uske sath (namaz mein) khara rehta hai, toh uske liye poori raat ki ibadat likh di jati hai.’ [Sunan Abu Dawood (2/51), Jami At-Tirmidhi (3/147-148), Sunan An-Nasaai (3/83-84), Sunan Ibn Majah (1/420-421)]
Lihaza, wo Imam ki pairwi kare aur uske sath Witr parhe. Yeh cheez usey raat ke aakhir mein kharay hone aur jitna asaan ho utni Tahajjud parhne se nahi rokti.” [Al-Muntaqa min Fatawa Fawzan (No. 116)]
(Penned by Mohammed bin Thajammul Hussain Manna.)
Saheehus-Seerah 