Sawal: “Shaikh-e-mohtaram, ek Hadees hai jisme Nabi (Salallahu Alaihi Wa Sallam) ne farmaya ke meri Ummat mein se sattar hazaar log baghair hisaab kitab aur baghair azaab ke Jannat mein daakhil honge. Jab Sahaba (razi Allahu anhum) aapas mein iske baare mein guftagu karne lage ke yeh log kaun honge aur unki sifaat kya hain, to Nabi (Salallahu Alaihi Wa Sallam) unke beech aaye aur farmaya ke yeh woh log hain jo jhaad phoonk nahi karwate, badshaguni (buray shagun) par yaqeen nahi rakhte, aur daagne ka amal (cauterization) ka ilaj nahi karwate.”
Sawal karne wale ki guzarish: “Hum umeed karte hain, ke aap humein in sifaat ki wazahat farma dein taake hum in par amal kar sakein.”
Shaikh Abdul Azeez bin Abdullah bin Baaz ka Jawab (Rahimahullah) :
Nabi (Salallahu Alaihi Wa Sallam) ne farmaya ke unki Ummat mein se sattar hazaar (70,000) log baghair hisaab kitaab ke Jannat mein dakhil honge. [1] Ek doosri riwayat mein Nabi (Salallahu Alaihi Wa Sallam) ne farmaya ke har ek hazaar logon ke sath, mazeed sattar hazaar log honge jo bina hisaab Jannat mein dakhil honge .[2]
Jab unse in logon ki sifaat ke mutalliq poocha gaya, to Nabi (Salallahu Alaihi Wa Sallam) ne farmaya: “Yeh woh log hain jo Ruqyah nahi karwate, buray shagun (badshaguni) par yaqeen nahi rakhte, daag (cauterization) ka ilaj nahi karwate, aur sirf apne Rab par poora bharosa (Tawakkul) rakhte hain.”
Iska matlab hai ke yeh (sattar hazaar log aur woh jo seedha Jannat mein dakhil honge) woh log hain jo Allah ke deen ko mazbooti se thaamte hain, taqwa aur imaan rakhte hain, sirf Allah ki ibadat karte hain, apni deeni zimmedariyan ada karte hain, haram cheezon se bachte hain, aur har qisam ki nekiyon mein koshish karte hain. Yeh log yahan tak ke kuch mustahab (pasandeeda) aamaal, jaise Ruqyah aur daagne ka amal (cauterization), se bhi door rehte hain kyunki unka imaan mukammal aur kaamil hota hai.
“Woh Ruqyah talab nahi karte” [3] – iska matlab yeh hai ke woh doosron se apne liye Ruqyah parhne ko nahi kehte. “Aur woh daagne ka amal (cauterization) nahi karwate” – kyunki isko chodna behtar hai, siwaye us surat ke jab iski zaroorat ho. In dono cheezon se door rehna unke Kamaal-e-Imaan (imaan ki takmeel) ki nishani hai.
Agar kisi shakhs ko Ruqyah ki zaroorat ho, to doosron se karwane mein koi harj nahi hai. Jaise Nabi (Salallahu Alaihi Wa Sallam) ne Aisha (Razi Allahu anha) ko Ruqyah karne ka hukm diya [4], aur Ja’far ibn Abi Talib (Razi Allahu anha) ke beto ki maa ko unke bachon ke liye Ruqyah karne ko kaha, jab unko buri nazar lag gayi thi. Isse maalum hota hai ke zarurat ke waqt kisi se apne upar ruqyah karne ke liye kehne mein koi harj nahi hai.
Lekin in tareeeqon ko chodna behtar hai agar koi doosri dawai ya ilaaj mojood ho jo kaafi ho sake. Isi tarah daagne ka amal (cauterization) bhi sirf tabhi ikhtiyar karna chahiye jab uski haqeeqi zaroorat ho. Sahaba, jaise Khabbab ibn Al-Aratt (Razi Allahu anhu)[5] aur doosre Sahaba, zaroorat padhne par daagne ka amal (cauterization) ka sahara lete the. Nabi (Salallahu Alaihi Wa Sallam) ne bhi apne kuch Sahaba ko daagne ka amal (cauterization) karwaya jab majboori thi [6].
Ye ek fazeelat wali baat hai (ke Ruqyah na karwana aur daagne ka amal (cauterization)) na karwana, lekin yeh insaan ko sattar hazaar logon mein shamil hone se bahar nahi karta.
Jab zarurat na ho toh daagne ka amal chodna aur zarurat na hone ki surat mein ruqyah talab karne se parhez karna inke nek amal mein se hai.
Sattar hazaar woh log hain jo istiqamat wale hain, jo Allah ki ita’at aur istiqamat se nekiyon mein lage rehte hain, gunaahon se door rehte hain, aur apne nekiyon ki hifazat karte hain. Na’am! (Haan!)
End of Fatwa.
[1] Al-Bukhari (6472) aur Muslim (220) mein Ibn ‘Abbas (Razi Allahu anhu) se riwayat hai ke Rasoolullah (Salallahu Alaihi Wa Sallam) ne farmaya:
“Meri Ummat mein se sattar hazaar log bina hisaab Jannat mein dakhil honge; yeh woh log hain jo doosron se Ruqyah karwane ko nahi kehte, buray shagun (badshaguni) par yaqeen nahi rakhte, daagne ka amal (cauterization) ka ilaj nahi karwate, aur sirf apne Rab par tawakkul rakhte hain.”
(Yeh ek tafseeli Hadees ka hissa hai.)
[2] Abu Umamah (Razi Allahu anhu) se riwayat hai ke Rasoolullah (Salallahu Alaihi Wa Sallam) ne farmaya:
“Mere Rabb ne mujh se waada kiya hai ke wo meri Ummat mein se sattar hazaar logon ko Jannat mein dakhil karega. Na in ka hisaab hoga aur na in par koi azaab,phir Har ek hazaar ke sath mazeed sattar hazaar honge, aur inke siwaa mere Rabb ki mutthi mein se teen mutthi ke barabar bhi honge (jinko Jannat mein dala jayega baghair hisaab ke).”
(Jami` at-Tirmidhi 2437, Hasan – Shaikh Zubair Ali Zai)
[3] ‘Ruqyah’ ek tareeqa hai jisme jismi aur roohani bimariyon ka ilaaj Qur’ani ayaat aur duaaon se kiya jata hai, jo Rasoolullah (Salallahu Alaihi Wa Sallam) ki taleemat ke mutabiq hota hai. Yeh buri nazar, jadoo aur mukhtalif jismi amraz ka ilaaj hai.
[4] Aisha (Razi Allahu anha) se riwayat hai ke Rasoolullah (Salallahu Alaihi Wa Sallam) ne mujhe hukm diya, ya logon ko hukm diya ke buri nazar ka ilaaj Ruqyah se karein.
(Sahih Al-Bukhari 5279)
[5] Qais kehte hain:
“Main Khabbab (razi Allahu anhu) ke paas gaya jab unke pait par saat dafa daag lagaya gaya tha. Unhon ne kaha: ‘Agar Rasoolullah (Salallahu Alaihi Wa Sallam) ne humein maut ki duaa karne se mana na kiya hota, to main uski duaa karta.’”
(Sunan An-Nasa’i 1823, Sahih – Shaikh Zubair Ali Zai)
[6] Jabir bin ‘Abdillah (Razi Allahu Anhu) se riwayat hai ke Jang-e-Ahzab ke din, Ubayy (Razi Allahu anhu) ko ek teer lagne se unki hath ki badi rag zakhmi ho gayi. Rasoolullah (Salallahu Alaihi Wa Sallam) ne us zakhm par daag lagwaya.
(Sahih Muslim 2207)
(Translated into Roman Urdu from English by Sahana Ibrahim.)
Saheehus-Seerah 